Discussion held on EEG’s first quarter accomplishment

ኢትዮ ኢንጂነሪንግ ግሩፕ እያከናወነ ያለው የሪፎርም ስራ ከዳር እንዲደርስ የመንግስት ድጋፍ ተጠናክሮ እንደሚቀጥል የገንዘብ ሚኒስትሩ አቶ አህመድ ሺዴ ተናገሩ፡፡የግሩፑ የ2014 የበጀት አመት 1ኛ ሩብ አመት አፈጻጸም የመንግስት የልማት ድርጅቶች ይዞታና አስተዳደር ኤጀንሲና የገንዘብ ሚኒስቴር ከፍተኛ የስራ ሃላፊዎች በተገኙበት ውይይት ተካሂዶበታል፡፡በግሩፑ በሪፎርም ስራዎች እያካሄዳቸው ያሉት ስራዎች ተለይተው በዝርዝር ቀርበዋል፡፡የፋይናንስ ሪፎርም ስራዎች፣በተቋሙ የኦዲት ስርአት ለመዘርጋት የተካሄዱ እንቅስቃሴዎች እንዲሁም የውስጥ ቁጥጥር ስርአትን በማጠናከር የሃብት ብክነትን ለመቀነስ የሚያስችሉ ተግባራት ላይ ውይይት ተካሂዷል፡፡የሰው ሃይል የአቅም ግንባታ ላይ በትኩረት መሰራቱና ተከታታይ ስልጠናዎችን በመስጠት አመለካከትና ክህሎትን ለማዳበር የሚያችሉ ተግባራት በሩብ አመቱ ተከናውነዋል፡፡በኦፕሬሽናል ሪፎርም ስራዎች የኢንዱስትሪዎችን ምርታማነት ለማሳደግ እየተካሄዱ ያሉ ስራዎች በዝርዝር ቀርበዋል፡፡የምርት ጥራትን ለማሳደግ ከኢትዮጵያ ደረጃዎች ኤጀንሲ ጋር በቅንጅት ለመስራት የመግባቢያ ስምምነት በመፈራረም ወደ ተግባር ተገብቷል ተብሏል፡፡የኢንዱስትሪዎች የምርታማነት ጥናትም ወደ ተግባር የመቀየር ስራ እየተከናወነ ነው፡፡በሁሉም መስክ የታዩ ስኬቶችና እጥረቶች ቀርበዋል፡፡በተጨማሪም ግሩፑ አሁንም ሊያተኩርባቸው በሚገቡ ምርቶችና ኢንዱስትሪዎች ላይ ትኩረቱን ያደረገ መነሻ ጥናትም በግሩፑ ግብይትና ሽያጭ ቀርቧል፡፡በጥናቱ አለም አቀፍ፣ቀጠናዊና ሃገራዊ የገበያ ዳሰሳን መሰረት በማድረግ እንዲሁም የግሩፑን ነባራዊ አቅም መሰረት በማድረግ ሊያተኩርባቸው የሚገቡ ሴክተሮች፣ኢንዱስትሪዎችና የምርት አይነቶች በዝርዝር ቀርበው ውይይት ተደርጎባቸዋል፡፡ከዚሁ ጋር በተያያዘ ከግሩፑ ጋር ለመስራት ፍላጎት ካሳዩ 25 የውጭ ሃገራት ኩባንያዎች ጋር ውይይት እየተደረገ መሆኑና የመግባቢያ ስምምነት የተደረሰባቸው መኖራቸውም ተያይዞ ቀርቧል፡፡በዚሁ ወቅት የግሩፑ ዋና ስራ አስፈጻሚ ኢንጂነር ህይወት ሞሲሳ በቀረቡት ጉዳዮች ላይ ማብራሪያ ሰጥተዋል፡፡ግሩፑን ለማሻገር ዘርፈ ብዙ የሪፎርም ስራዎች መከናወናቸውን ያብራሩ ሲሆን ትርፋማ ተቋም ለመገንባት የሚያስችል መሰረት መጣሉን አሳውቀዋል፡፡በተለያዩ ዘርፎች ጠንካራ የአሰራር መመሪያዎችን በማዘጋጀትና እንዲተገበሩ በማድረግ ለምርታማነት መደላድሉ መቀመጡን ተናግረዋል፡፡ያም ሆኖ የውጭ ምንዛሪ እጥረትና ከባለፉት አመታት ተንከባለው የመጡና ያልጠሩ መረጃዎች በተፈለገው ፍጥነት ምርታማነትን ማሳደግ አለመቻሉን በማንሳት መንግስት ድጋፉን እንዲያጠናክር ጠይቀዋል፡፡የገንዘብ ሚኒስትሩ አቶ አህመድ ሺዴ በበኩላቸው ኢንዱስትሪዎች ምርታማነታቸውን እንዲያሳድጉ የግሩፑን ማኔጅመንትንና የቦርድ አባላት እያደረጉት ላለው ጥረት አመሰግነዋል፡፡መንግስት እያደረገ የሚገኘውን ድጋፍም አጠናክሮ እንደሚቀጥል አረጋግጠዋል፡፡በቀጣይም ቁልፍ የሆኑ ሴክተሮችን በመለየትና የገበያ ክፍተትን የሚሞሉ የማኑፋክቸሪንግ ምርቶች ማምረት እንደሚገባም ገልጸዋል፡፡

Leave a Reply

Your email address will not be published. Required fields are marked *